Православный календарь

СПРЯТАТЬ ТРОПАРИ

Тропарь воскресный, глас 5.
Собезнача́льное Сло́во Отцу́ и Ду́хови,/ от Де́вы ро́ждшееся на спасе́ние на́ше,/ воспои́м, ве́рнии, и поклони́мся,/ я́ко благоволи́ пло́тию взы́ти на Кре́ст,/ и сме́рть претерпе́ти,/ и воскреси́ти уме́ршия/ сла́вным воскресе́нием Свои́м.

Богородичен, глас тойже.
Ра́дуйся, две́ре Госпо́дня непроходи́мая./ Ра́дуйся, стено́ и покро́ве притека́ющих к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й от воспева́ющих,/ и кла́няющихся рождеству́ Твоему́.

Кондак, глас тойже.
Ко а́ду, Спа́се мой, соше́л еси́,/ и врата́ сокруши́вый я́ко всеси́лен,/ уме́рших я́ко Созда́тель совоскреси́л еси́,/ и сме́рти жа́ло сокруши́л еси́,/ и Ада́м от кля́твы изба́влен бы́сть,/ Человеколю́бче, те́мже вси зове́м:/ спаси́ нас, Го́споди.

Свт. Арсения, еп. Тверского. Тропарь, глас 1.
Боже́ственною свы́ше просвети́вся благода́тию, святи́телю,/ и мно́гим терпе́нием во вре́меннеи жи́зни по́двиг соверши́л еси́./ Те́мже источа́еши чуде́с благода́ть/ и́же с ве́рою приходя́щим к честне́й ра́це моще́й твои́х, Арсе́ние преблаже́нне./ Мы же вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8.
Я́ко богоя́вленная росси́йская звезда́,/ днесь, сия́я чудесы́,/ яви́лся еси́, святи́телю Арсе́ние./ Тем непреста́нно моли́ся Христу́ Бо́гу о ста́де твое́м/ и сохраня́й оте́чество твое́, град же и лю́ди,/ и́же ве́рою почита́ющих честно́е пренесе́ние твое́/ и к честны́м моще́м твои́м припа́дающих со стра́хом и любо́вию целу́ющих я./ Да вси велегла́сно зове́м ти:/ ра́дуйся, Богому́дре святи́телю Арсе́ние, о́тче наш.

Собор Тверских святых. Тропарь, глас 4.
И́же в земли́ Тверско́й просла́вльшиися,/ святи́телие, му́ченицы,/ преподо́бнии, пра́веднии/ и вси святи́и,/ ве́рою, по́двиги благоче́стия,/ любо́вию, кро́тостию, сло́вом и житие́м/ Бо́гу благоугоди́вшии/ и венцы́ нетле́ния и сла́вы украси́вшиися,/ моли́те Христа́ Бо́га на́шего/ дарова́ти мир стране́ на́шей/ и душа́м на́шим в ми́ре спасти́ся.

Кондак святых, глас 4.
На земли́ благоче́стно пожи́вшии,/ святи́и, в земли́ Тверско́й просия́вшии,/ и ны́не на Небесе́х со Áнгелы ра́дуетеся/ и Тро́ицу Святу́ю — Отца́, и Сы́на, и Свята́го Ду́ха во Еди́ном Божестве́ прославля́ете./ Мы же, земноро́днии, моли́твенно ублажа́юще вас/ и святу́ю па́мять соверша́юще, мо́лим:/ принеси́те на́ша моли́твы к Небе́сному Престо́лу Го́спода Вседержи́теля,/ да Ва́шим хода́тайством/ да́рует мир и спасе́ние душа́м на́шим.

Ина служба Собора Тверских святых.
Тропарь святых, глас 4.
Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кондак, глас 8.
Мно́гими скорбьми́ путь земны́я жи́зни преидо́сте/ и, дости́гше кра́я у́мнаго жела́ния,/ в черто́г Боже́ственныя сла́вы всели́стеся,/ и ны́не, ра́дующеся со всех Царе́м и Бо́гом,/ моли́теся, я́ко да и мы ва́шего блаже́нства прича́стницы бу́дем,/ ваш собо́р почита́ющии,/ святи́и покрови́телие Тверски́я страны́.

Тропарь преподобному Ефрему, глас 1.
Боже́ственною свы́ше просвети́ся благода́тию, преподо́бне,/ мно́гим терпе́нием во вре́менной жи́зни по́двиг соверши́л еси́./ Те́мже источа́еши чуде́с благода́ть/ всем, с ве́рою приходя́щим к моще́м твои́м, Ефре́ме преблаже́нне./ Сего́ ра́ди зове́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак преподобному Аркадию, глас 2.
К глуби́нам Боже́ственнаго ра́зума впери́в ум свой,/ в Небе́сныя оби́тели восте́кл еси́,/ и равноа́нгельно житие́, о́тче Арка́дие, на земли́ пожи́л еси́,/ и во всем повину́лся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у Престо́ла Влады́ки Христа́,/ моли́ся непреста́нно о всех нас.

Тропарь святому благоверному великому князю Михаилу, глас 8.
Возвы́сив ум твой к Бо́гу,/ жития́ со Áнгелы возжеле́л еси́,/ тле́нную сла́ву земну́ю оста́вил еси́, блаже́нне,/ и положи́л еси́ ду́шу твою́ за лю́ди твоя́,/ восприя́л еси́ вене́ц проти́ву трудо́в твои́х, Богому́дре Михаи́ле,/ моли́ Христа́ Бо́га о чту́щих любо́вию святу́ю па́мять твою́.

Кондак преподобному Нилу, глас 8.
Оте́чества, преподо́бне, удали́вся,/ в пусты́ню всели́лся еси́,/ и, на о́стров Селиге́ра е́зера восше́д,/ жесто́ко житие́ показа́л еси́,/ и, мно́гих доброде́тельми удиви́в,/ дарова́ния чуде́с от Христа́ прия́л еси́. Помина́й нас, чту́щих па́мять твою́, да зове́м ти:/ ра́дуйся, Ни́ле, о́тче наш.

Тропарь святителю Арсению, глас 8.
Благоче́стно пожи́в во святи́тельстве,/ лю́ди просвети́л еси́ уче́нием твои́м,/ и о хра́ме Пречи́стыя вельми́ подвиза́вся/ и люби́тель мона́хов быв,/ сего́ ра́ди от Христа́ па́ствы твоея́ вене́ц прия́л еси́./ Те́мже, я́ко апо́стольскаго престо́ла наме́стника/ и святи́теля вели́каго чту́ще тя, мо́лим, ча́да твоя́, блаже́нне:/ от всех бед изба́ви нас я́же ко Христу́ моли́твами твои́ми,/ святи́телю Христо́в Арсе́ние, о́тче наш.

Тропарь святителю Варсонофию, глас 3.
Возвести́телю пути́ спаси́тельнаго,/ и́стинный храни́телю апо́стольских преда́ний,/ сто́лпе непоколеби́мый,/ благоче́стия учи́телю и правосла́вия наста́вниче,/ святи́телю Варсоно́фие, Влады́ку всех моли́/ мир вселе́нней дарова́ти/ и душа́м на́шим ве́лию ми́лость.

Прп. Сисоя Великого. Тропарь, глас 2.
Плотски́я стра́сти умертви́в воздержа́нием,/ ми́ру распя́лся еси́ и, в пусты́ни живы́й,/ всех по́хотей отсече́нием/ Áнгел земны́й и Небе́сный челове́к показа́лся еси́,/ сего́ ра́ди тя, я́ко наста́вника и́ноком,/ пое́м, Сисо́е о́тче наш, и про́сим:/ моли́ Христа́ Бо́га, да спасе́т ду́ши на́ша.

Ин тропарь, глас 1.
Пусты́нный жи́тель, и в телеси́ Áнгел,/ и чудотво́рец яви́лся еси́, Богоно́се о́тче наш Сисо́е,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин кондак, глас 8.
Я́ко безпло́тным единожи́тель/ и всем преподо́бным соприча́стник,/ по́стническими труды́ и бде́нии моли́твенными непреста́нно себе́ вооружа́я, му́дре,/ тем и дар прия́л еси́ от Бо́га/ исцеля́ти неду́ги и прогоня́ти бе́сы./ Того́ ра́ди вопие́м ти:/ ра́дуйся, о́тче наш Сисо́е преподо́бне.

Кондак, глас 4.
Подвиза́вся, Áнгел на земли́ виде́н был еси́,/ озаря́яй, преподо́бне, помышле́ния ве́рных Богозна́меньми всегда́./ Те́мже тя ве́рою, Сисо́е, почита́ем.

Собор Радонежских святых. Тропарь, глас 4.
Днесь све́тло пра́зднуем, ве́рнии лю́дие,/ пресла́вныя Тро́ицкия оби́тели торжество́:/ се бо ве́лий собо́р святы́х чудотво́рцев Ра́донежских,/ я́ко ди́вныя пти́цы небе́сныя,/ явля́ет нам Це́рковь Росси́йская,/ стезя́ми честна́го их жития́ ше́ствовати всех призыва́ющи,/ к ни́мже, с ве́рою и любо́вию притека́юще, воззове́м:/ моли́теся о нас ко Пресвяте́й Тро́ице,/ преподо́бнии отцы́ на́ши с Богоно́сным а́ввою Се́ргием,/ мир ми́рови дарова́ти/ и душа́м на́шим ве́лия ми́лости.

Ин тропарь, глас 2.
Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к лицу́ зри́те Пресвяту́ю Тро́ицу,/ Ю́же дерзнове́нно моли́те,/ спасти́ся душа́м на́шим.

Кондак, глас 8.
Прииди́те, вси концы́ оте́чества на́шего,/ просла́вим святы́й лик уго́дников Ра́донежских,/ я́ко зве́зды, украси́вших не́бо церко́вное по́двиги земна́го жи́тельства,/ тех бо предста́телъством те́плым ко Го́споду/ мно́гия нам ми́лости Его́ низпосыла́ются,/ бе́дствия отгоня́ются и злы́я стра́сти укроща́ются./ И́хже всесвяту́ю па́мять ны́не пра́зднующе, та́ко возопии́м:/ ра́дуйтеся, Се́ргие и Ни́коне и вси Ра́донежстии чудотво́рцы,/ усе́рднии служи́телие Живонача́льныя Тро́ицы.

Прав. девы Иулиании. Тропарь, глас 8.
Я́ко непоро́чная неве́ста Нетле́ннаго Жениха́ Христа́,/ пра́ведная де́во Иулиани́е,/ с све́тлою свеще́ю до́брых дел вошла́ еси́ в черто́г Его́ Небе́сный/ и та́мо со святы́ми блаже́нства ве́чнаго наслажда́ешися./ Те́мже моли́, Его́же возлюби́ла еси́/ и Ему́же де́вство твое́ обручи́ла еси́,/ спасти́ ду́ши на́ша.

Ин тропарь, глас 2.
Де́вства добро́тами преочище́на/ и целому́дрия цветы́ венча́вшися,/ Богоблаже́нная де́во Иулиани́е,/ яви́лася еси́ ми́ру в нетле́нием телеси́ твое́м,/ исто́чник исцеле́ний и даро́в духо́вных подаю́щи всем к тебе́ притека́ющим,/ и ны́не, я́ко свеща́ те́плая, благода́ти еле́ем возжже́нная,/ предстоя́щи Престо́лу Го́спода и Жениха́ твоего́ Небе́снаго,/ Того́ моли́, де́во чи́стая,/ изба́вити нас от вся́каго зла,/ чту́щих па́мять твою́ ве́рою и любо́вию.

Ин кондак, глас 8.
Приво́дим Ти, о Всеще́дре, Иулиани́ю,/ присносветя́щую свещу́, еле́ем благода́ти обдержи́мую,/ немощны́м цельбу́./ Ея́же моли́твами от вся́каго зла свободи́ нас и спаси́ всех,/ и́же Тя с поклоне́нием велича́ют.

Кондак, глас 8.
Храм Бо́жий одушевле́нный,/ де́вственною чистото́ю благоукра́шенный,/ ве́мы тя, свята́я и пра́ведная де́во, княжно́ Иулиани́е,/ те́мже, с любо́вию пра́зднующе/ святы́х твои́х моще́й обре́тение, мо́лим тя,/ изве́стная жела́ний на́ших хода́таице:/ принеси́ за нас моли́твы твоя́ ко Го́споду/ и от вся́ких бед свобожда́й нас/ предста́тельством твои́м у Престо́ла Всевы́шняго, да зове́м ти:/ ра́дуйся, де́во свята́я Иулиани́е, неве́сто Христо́ва прекра́сная.

Прп. Сисоя, схимника Печерского, в Дальних пещерах. Тропарь, глас 1.
Пусты́нный жи́тель, и в телеси́ Áнгел,/ и чудотво́рец яви́лся еси́, Богоно́се о́тче наш Сисо́е,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас тойже.
Сисо́е чу́дне,/ на стра́сти вельми́ подвиза́выйся/ и посто́м и нощны́ми моли́твами сия́ успи́вый,/ благода́ть от Христа́ прия́л еси́/ в страсте́х бе́дствующим посо́бствовати./ Тем и на́ша стра́сти пло́ти и ду́ха исцели́, мо́лимся.

Блгв. князя Глеба Всеволодовича, иже в Киеве. Тропарь, глас 2.
В по́стничестве от ю́ности до́бре подвиза́вся, Богому́дре,/ ум на враги́ му́жески вооружи́в,/ ору́жием кре́стным сих победи́л еси́,/ твердому́дростная повлача́, в ду́шу вложи́ свою́./ Те́мже похваля́ем тя, кня́же наш Гле́бе,/ я́ко по́стником ты еси́ удобре́ние,/ Ки́еву — сла́ва/ и всей Ру́сстей земли́ — утвержде́ние.

Кондак, глас 1.
Госпо́днею благода́тию вооружи́ся/ и непреста́нными моли́твами, воздержа́нием, поще́нием и труды́/ духо́внаго дарова́ния от Бо́жия Ду́ха испо́лнися,/ сего́ ра́ди чудотво́рец показа́ся,/ исцеля́я неду́ги и бе́сы прогоня́я,/ кня́же наш Гле́бе,/ моли́ Христа́ Бо́га/ непреста́нно о всех нас.