Православный календарь

СПРЯТАТЬ ТРОПАРИ

Тропарь воскресный, глас 3.
Да веселя́тся Небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь,/ попра́ сме́ртию сме́рть,/ пе́рвенец ме́ртвых бы́сть;/ из чре́ва а́дова изба́ви нас,/ и подаде́ ми́рови ве́лию ми́лость.

Богородичен, глас тойже.
Тя хода́тайствовавшую спасе́ние ро́да на́шего,/ воспева́ем, Богоро́дице Де́во:/ пло́тию бо от Тебе́ восприя́тую Сын Твой и Бог наш,/ Кресто́м восприи́м стра́сть,/ изба́ви нас от тли я́ко Человеколю́бец.

Кондак, глас тойже.
Воскре́сл е́си днесь из гро́ба, Ще́дре,/ и нас возве́л еси́ от врат сме́ртных;/ днесь Ада́м лику́ет, и ра́дуется Éва,/ вку́пе же и проро́цы с патриа́рхи воспева́ют непреста́нно/ Боже́ственную держа́ву вла́сти Твоея́.

Мц. Параскевы. Тропарь, глас 4.
Прему́драя и всехва́льная Христо́ва му́ченица Параске́ва,/ му́жескую кре́пость прии́мши,/ же́нскую же не́мощь отве́ргши,/ диа́вола победи́ и мучи́теля посрами́,/ вопию́щи и глаго́лющи:/ прииди́те, те́ло мое́ мече́м ссецы́те и огне́м сожги́те,/ аз бо, ра́дующися, иду́ ко Христу́, Жениху́ моему́./ Тоя́ моли́твами, Христе́ Бо́же,/ спаси́ ду́ши на́ша.

Ин тропарь святыя великомученицы Параскевы, глас 8.
И́же ве́руя и му́жеством душе́вным, тезоимени́тне,/ диа́вола посрами́ла еси́/ и мучи́тельское преще́ние и ра́ны до́блественне победи́ла еси́,/ му́ченице Параске́во, вопия́:/ мече́м сосеца́йте и огне́м сожиза́йте те́ло мое́,/ я́ко да, ра́дуюся, прииду́ Жениху́ моему́ Христу́ Бо́гу./ Его́же моли́ спасти́ся душа́м на́шим.

Кондак, глас 3.
Всесвято́е и непоро́чное муче́ние прине́сши,/ я́ко ве́но пречестно́е, безсме́ртному Жениху́ Христу́,/ Áнгельское ликостоя́ние возвесели́ла еси́/ и победи́ла еси́ де́монския ко́зни./ Сего́ ра́ди тя че́стно ве́рою чтим,/ му́ченице Параске́во многострада́льная.

Мчч. Терентия и Неониллы и чад их. Тропарь, глас 4.
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости,/ тех моли́твами/ спаси́ ду́ши на́ша.

Тропарь Стефана, глас 5.
Воздержа́нием житие́ украси́ и стра́сти умертви́в,/ посрами́л еси́ вра́жия прило́ги, о́тче Стефа́не,/ и преложи́ся к Бо́гу, чудотво́рец показа́ся,/ в ве́чней сла́ве со Áнгелы лику́я,/ с ни́ми же моли́ поми́ловати ду́ши на́ша.

Кондак Стефана, глас 4.
Насади́л еси́ доброде́телей рай/ и напои́л еси́ то́ками слез твои́х,/ я́ко жи́зни, всесла́вне, дре́во получи́в,/ спаси́ моли́твами твои́ми от тли ста́до твое́,/ изба́ви от обстоя́ний те́пле чту́щих тя, Стефа́не,/ тя бо предста́теля велича́йша, му́дре,/ вси ве́рою и любо́вию стяжа́хом.

Кондак, мучеников, глас 4.
Му́ченическая честна́я па́мять прии́де днесь, веселя́щи вся́ческая,/ Тере́нтия прему́драго и подру́жии его́./ Те́пле у́бо стеце́мся, да прии́мем исцеле́ние,/ си́и бо благода́ть прие́мше от Ду́ха Свята́го/ исцеля́ти неду́ги и боле́зни душ на́ших.

Свт. Димитрия, митр. Ростовского. Тропарь, глас 8.
Правосла́вия ревни́телю и раско́ла искорени́телию,/ Росси́йский целе́бниче и но́вый к Бо́гу моли́твенниче,/ списа́ньми твои́ми бу́их уцелому́дрил еси́,/ цевни́це духо́вная, Дими́трие блаже́нне,/ моли́ Христа́ Бо́га спасти́ся душа́м на́шим.

Кондак, глас 4.
Звезду́ Росси́йскую, от Ки́ева возсия́вшую,/ и чрез Но́вград Се́верский в Росто́в дости́гшую,/ всю же страну́ сию́ уче́ньми и чудесы́ озари́вшую,/ ублажи́м златослове́снаго учи́теля Дими́трия:/ той бо всем вся написа́, я́же к наставле́нию,/ да всех приобря́щет, я́коже Па́вел, Христу́/ и спасе́т правове́рием ду́ши на́ша.

Свт. Арсения, архиеп. Сербского. Тропарь, глас 8.
Ми́лости наста́вниче и благоутро́бия сокро́вище,/ е́же всем отве́рзл еси́,/ правове́рия учи́телю и архиере́ев Боже́ственное удобре́ние,/ о́тче наш, иера́рше Арсе́ние,/ ни́щих был еси́ засту́пник:/ тем моли́ Христа́ Бо́га,/ просвети́ти ду́ши на́ша, да не когда́ усне́м в смерть.

Кондак, глас 2.
В пи́щи слове́с твои́х, Богоно́се Арсе́ние,/ разу́мно ча́да твоя́ пита́я,/ язы́ком хваля́, устна́ми же пе́ние принося́, веща́нием зовы́й:/ Христе́, Ты еси Свет неизрече́нный.

Прп. Иова, игумена Почаевского. Тропарь, глас 4.
Многострада́льнаго пра́отца долготерпе́ние стяжа́в,/ Крести́телеву воздержа́нию уподобля́яся,/ Боже́ственныя же ре́вности обою́ приобща́яся,/ тех имена́ досто́йно прия́ти сподо́бился еси́/ и и́стинныя ве́ры был еси́ пропове́дник безбоя́знен;/ те́мже мона́хов мно́жества ко Христу́ приве́л еси́,/ и вся лю́ди в Правосла́вии утверди́л еси́,/ И́ове преподо́бне о́тче наш,/ моли́ спасти́ся душа́м на́шим.

Кондак, глас 4.
Яви́лся еси́ И́стинныя ве́ры столп,/ Ева́нгельских же за́поведей ревни́тель,/ горды́ни обличе́ние, смире́нным же предста́тель и науче́ние:/ те́мже и ублажа́ющим тя грехо́в отпуще́ние испроси́/ и оби́тель твою́ невреди́му сохрани́,/ И́ове о́тче наш,/ Многострада́льному подо́бный.

Св. Арсения Каппадокийского. Тропарь, глас 3.
Житие́ богоуго́дное до́бре сконча́в/ сосу́д че́стен Утеши́теля яви́лся еси́, Богоно́сне Арсе́ние,/ чуде́с благода́ть прии́м, всем подае́ши ско́рое вспоможе́ние,/ о́тче преподо́бне,/ Христу́ Бо́гу моли́ся/ дарова́ти нам ве́лию ми́лость.