Православный календарь

СПРЯТАТЬ ТРОПАРИ

Cвт. Петра, митр. Московского, всея России чудотворца. Тропарь, глас 4.
Я́же пре́жде безпло́дная, земле́, ны́не весели́ся:/ се бо Христо́с свети́льника в тебе́ показа́,/ я́ве сия́юща в ми́ре/ и исцелева́юща неду́ги и боле́зни на́ша./ Сего́ ра́ди лику́й и весели́ся со дерзнове́нием:/ святи́тель бо есть Вы́шняго,/ сия́ соде́ловаяй.

Ин тропарь, глас 8.
Лику́й све́тло, благосла́внейший гра́де Москва́/, име́яй в себе́ архиере́я Петра́,/ я́ко зарю́ со́лнца, всю Росси́ю чудодея́нии озаря́юща:/ той бо не́мощи врачу́ет/ и неду́ги, я́ко тьму, прого́нит от вопию́щих ему́:/ ра́дуйся, иера́рше Бо́га Вы́шняго,/ тобо́ю сия́ па́стве твое́й соде́ловающаго.

Ин тропарь, глас 4.
Благове́рно пожи́в в ми́ре,/ житие́м чи́стым просвети́вся,/ уче́нием святи́тельства прии́м па́ству,/ апо́столом насле́дниче./ Тем прие́м дар чуде́с от Бо́га, о́тче Пе́тре,/ моли́ Христа́ Бо́га/ да спасе́т ду́ши на́ша.

Кондак Петру, глас 4.
Яви́ся днесь пресве́тлая па́мять твоя́, святи́телю преблаже́нне Пе́тре,/ в ми́ре све́тло сия́ющи/ и явля́ющи всем Боже́ственное сия́ние.

Кондак, глас 2.
Взбра́нному и ди́вному на́шея земли́ чудотво́рцу,/ днесь любо́вию тебе́ притека́ем, песнь, Богоно́се, плету́ще,/ я́ко, име́я дерзнове́ние ко Го́споду,/ многообра́зных изба́ви нас обстоя́ний, да зове́м ти:/ ра́дуйся, утвержде́ние гра́ду на́шему.

Предпразднство Рождества Христова. Тропарь, глас 4.
Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо Óноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не я́коже Áдам у́мрем./ Христо́с ражда́ется пре́жде па́дший возста́вити о́браз.

Кондак предпразднства, глас 3.
Де́ва днесь преве́чное Сло́во в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со Áнгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Мч. Иулиании. Тропарь, глас 4.
Áгница Твоя́, Иису́се, Иулиани́я/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя, да и живу́ с То́бою,/ но, я́ко же́ртву непоро́чную, приими́ мя, с любо́вию поже́ршуюся Тебе́./ Тоя́ моли́твами,/ я́ко ми́лостив, спаси́ ду́ши на́ша.

Кондак, глас 2.
В Вифлее́ме зря́ще пелена́ми повива́емаго,/ всю зе́млю держа́ща руко́ю Свое́ю,/ предпра́зднственныя пе́сни Ро́ждшей Сего́ прино́сим:/ ма́терски бо весели́тся, держа́щи в не́дрех Сы́на Бо́жия.

Кондак святыя, глас 3.
Де́вства добро́тами преочище́на, деви́це,/ и муче́ния венцы́, Иулиани́е, ны́не венча́вшися,/ дае́ши су́щим в ну́ждах и неду́зех исцеле́ние и спасе́ние,/ приступа́ющим к ра́це твое́й:/ Боже́ственную бо благода́ть Христо́с источа́ет и жизнь ве́чную.

Блгв. кн. Иулиании Вяземской. Тропарь, глас 2.
Благоче́стно в зако́не пожи́вши/ и благи́ми де́лы украси́вшися,/ я́ко кре́пкий адама́нт, яви́ся,/ целому́дренная свята́я благове́рная княги́не Иулиа́ние,/ тле́нную сла́ву и добро́тство теле́сное презре́вши,/ злоко́зненнаго врага́ победи́ла еси́,/ целому́дрия ра́ди му́ченическую смерть прия́ла еси́./ Сего́ ра́ди от Христа́ Бо́га нетле́нным и ве́чным венце́м венча́вшися,/ ны́не с ли́ки му́ченик лику́еши/ и нам ве́лия чудеса́, приходя́щим ко гро́бу твоему́,/ оби́льно источа́еши./ Те́мже ти вопие́м:/ моли́ся Христу́ Бо́гу о всех нас,/ ве́рою и любо́вию страда́ния твоя́ почита́ющих.

Кондак, глас 2.
Воспое́м днесь Благоде́теля всех Бо́га,/ просла́вльшаго в Росси́и Иулиани́ю Богому́друю,/ да моли́твами ея́ пода́ст душа́м на́шим/ грехо́в оставле́ние и ве́лию ми́лость.

Блж. Прокопия. Тропарь, глас 4.
И́же на земли́ Христа́ ра́ди во́лею в бу́йство преложи́ся,/ и ми́ра сего́ красо́ты отню́д возненави́де,/ и плотска́я игра́ния увяди́в посто́м и жа́ждою/ и на земли́ лега́нием,/ от зимы́ студе́нию и мра́зом,/ и от зно́я со́лнечнаго и дождя́/ и про́чия тяготы́ никогда́ же уклони́ся под кров,/ и на те́ле свое́м не име́я одея́ния,/ Бо́жиею по́мощию покрыва́ем,/ и ду́шу очи́стил еси́ доброде́тельми свои́ми, я́ко зла́то в горни́ле,/ Проко́пие прему́дре,/ с ве́рою творя́щим па́мять твою́ че́стно/ и усе́рдно притека́ющим к моще́м твои́м,/ прославля́юще твое́ свято́е успе́ние,/ Христу́ Бо́гу моли́ся, благою́роде,/ да изба́вит ны Госпо́дь от ва́рварскаго наше́ствия и междоусо́бныя бра́ни/ и мир ми́рови да́рует/ и душа́м на́шим ве́лию ми́лость.

Ин тропарь, глас 4.
Ве́лию любо́вь ко Го́споду в себе́ име́я,/ все претру́дное житие́ твое́/ во гра́де Хлы́нове, юро́дствуя, прове́л еси́, блаже́нне Проко́пие,/ зной и мраз, глад и жа́жду благоду́шно терпя́,/ бие́ние и поноше́ние от люди́й безбо́жных/ ра́достно принима́л еси́, подви́жниче добропобе́дный,/ любо́вию же и добро́м ве́лиим за зло воздава́я,/ мно́зем предрека́л еси́ их ожида́ющее/ и от неду́гов исцеля́л еси́, беззло́бие,/ тем же, наслажда́яся ны́не в со́нме святы́х,/ моли́ Го́спода поми́ловати град и лю́ди, тя почита́ющия.

Ин тропарь, глас 8.
Áнгельски живя́ на земли́ богоуго́дно,/ мно́гия ско́рби и труды́ терпели́во неся́,/ доброде́тельми и дарова́ниями от Бо́га украси́вся,/ предвеща́я гряду́щая и исцеля́я боле́зни,/ безмо́лвно, непреста́нно моля́ся,/ юро́дствуя, скры́в дарова́ния своя́,/ ны́не наслажда́яся в селе́ниих святы́х,/ святы́й блаже́нне Проко́пие,/ моли́ Христа́ Бо́га спасти́ся душа́м на́шим.

Ин кондак, глас 8.
Мно́гою любо́вию к Бо́гу пламене́я,/ любви́ и смире́нию люде́й безмо́лвно учи́л еси́,/ дея́нием бу́дущая явля́я,/ неду́ги и боле́зни цели́л еси́./ На путь спасе́ния нас наста́ви,/ от язв грехо́вных исцели́,/ Проко́пие блаже́нне,/ о всех нас Христа́ Бо́га моли́.

Кондак, глас 2.
Возбра́нному и ди́вному в пра́ведницех му́жу,/ во́лею во юро́дство претвори́вшуся,/ ми́ра сего́ красо́ты возненави́дел еси́,/ плотска́я мудрова́ния увяди́л еси́ посто́м и жа́ждею,/ студе́нию мра́за, сне́га, и зно́я, и дождя́,/ и от про́чия возду́шныя тяготы́ никогда́ же уклони́ся/ и очи́стил еси́ себе́, я́ко зла́то в горни́ле, Проко́пие блаже́нне,/ всей Вя́тской земли́ похвала́ и утвержде́ние.