Православный календарь

СПРЯТАТЬ ТРОПАРИ

Всех русских святых. Тропарь, глас 8.
Я́коже плод кра́сный Твоего́ спаси́тельнаго се́яния,/ земля́ Росси́йская прино́сит Ти, Го́споди, вся святы́я, в той просия́вшия./ Тех моли́твами в ми́ре глубо́це/ Це́рковь и страну́ на́шу Богоро́дицею соблюди́, Многоми́лостиве.

Ин тропарь, глас 4.
Иерусали́ма Вы́шняго гра́жданы,/ от земли́ на́шея возсия́вшия/ и Бо́гу во вся́цем чину́/ и вся́ким по́двигом угоди́вшия,/ прииди́те, воспои́м, ве́рнии:/ о всеблаже́ннии земли́ Росси́йския засту́пницы,/ моли́теся ко Го́споду,/ да поми́лует сию́ от гне́ва Своего́,/ исцеля́я сокруше́ние ея́,/ и ве́рныя лю́ди Своя́ уте́шит.

Кондак, глас 6.
Предста́телие страны́ на́шея неусы́пнии,/ хода́таи о нас ко Творцу́ непреста́ннии,/ не пре́зрите моле́ний на́ших,/ но, предваря́юще на по́мощь, я́ко сро́дницы на́ши,/ ускори́те на моли́тву/ и потщи́теся на умоле́ние,/ предста́тельствующе при́сно о чту́щих вас.

Кондак святых, глас 3.
Днесь лик святы́х, в земли́ на́шей Бо́гу угоди́вших, предстои́т в Це́ркви/ и неви́димо за ны мо́лится Бо́гу./ Áнгели с ним славосло́вят,/ и вси святи́и Це́ркве Христо́вы ему́ спра́зднуют,/ о нас бо мо́лят вси ку́пно/ Преве́чнаго Бо́га.

Всех преподобных и богоносных отцев, во Святой Горе Афонской просиявших. Тропарь, глас 1.
Пусты́ни Афо́нския отцы́,/ Áнгелы во пло́ти,/ испове́дники вку́пе и преподо́бныя,/ святи́тели же и му́ченики в пе́ниих почти́м,/ подража́юще доброде́телем их,/ зову́ще согла́сно и глаго́люще:/ сла́ва Просла́вльшему вы,/ сла́ва Венча́вшему вы,/ сла́ва в беда́х предста́тели нам вы Показа́вшему.

Кондак, глас 4.
Онебеси́вшия Го́ру сию́,/ и показа́вшая в ней житие́ а́нгельское,/ и мно́жество мона́хов собра́вшия отцы́,/ прииди́те, благохва́лим вси, к ним взыва́юще:/ вся́ния беды́ и искуше́ния нас изба́вите,/ мно́жество преподо́бных,/ Афо́нская похвало́.

Всех святых, в Болгарии просиявших. Тропарь, глас 4.
Собо́р ваш честны́й почита́юще/ и па́мять святу́ю пра́зднующе,/ святи́и, от бо́лгар просия́вшии,/ приле́жно мо́лим вы:/ Го́спода о всех моли́те,/ па́че же о при́сных,/ сохрани́тися земли́ Бо́лгарстей от вся́ких бед/ и наро́ду утверди́тися на ве́ки в ве́ре Правосла́вней,/ я́ко да, ми́рное житие́ благоче́стно пожи́вше,/ вку́пе с ва́ми улучи́м ве́чное Оте́чество/ в блаже́ннем Христа́ Бо́га Ца́рствии.

Кондак всем святым болгарским, глас 2.
В моли́твах не усыпа́юще/ и в предста́тельствах не престаю́ще,/ Го́спода ми́лостива нам твори́те,/ святи́и, от бо́лгар просия́вшии,/ я́ко да, па́мять ва́шу пра́зднующе,/ с ра́достию сию́ твори́м,/ до втора́го Судии́ прише́ствия и всех Воскресе́ния.

Калужской иконы Богородицы. Тропарь, глас 4.
Засту́пнице от враг иноплеме́нных Необори́мая Калу́жския земли́,/ и Изба́вительнице от смертоно́сныя я́звы Ми́лостивая!/ Изба́ви рабы́ Твоя́ от вся́ких бед и боле́зней,/ с ве́рою и любо́вию прибега́ющия к чудотво́рней ико́не Твое́й,/ и спаси́ ду́ши на́ша.

Кондак, глас 6.
Не и́мамы пе́сней, ниже́ слове́с,/ ка́ко досто́йно восхваля́ти Тя,/ Ма́ти Христа́ Бо́га на́шего,/ явле́ния ра́ди чудотво́рныя ико́ны Твоея́ земли́ Калу́жстей,/ то́кмо мо́жем вопи́ти Тебе́:/ не отврати́ ми́лости Твоея́ от нас,/ и ниспосли́ ю всем притека́ющим к цельбоно́сней ико́не Твое́й.

Величание.
Велича́ем Тя,/ Богоро́дице Де́во,/ и почита́ем чудотво́рную ико́ну Твою́,/ е́юже благоволи́ла еси́ спасти́ зе́млю Калу́жскую/ от наше́ствий вра́жиих и всегуби́тельных боле́зней.

Тропарь воскресный, глас 1.
Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл е́сли тридне́вный, Спа́се,/ да́руяй ми́рови жи́знь./ Сего́ ра́ди Си́лы Небе́сныя вопия́ху Ти, Жизнода́вче:/ сла́ва Воскресе́нию Твоему́, Христе́,/ сла́ва Ца́рствию Твоему́,/ сла́ва смотре́нию Твоему́, еди́не Человеколю́бче.

Богородичен, глас тойже.
Гаврии́лу, веща́вшу Тебе́ Де́во, ра́дуйся,/ со гла́сом воплоща́шеся все́х Влады́ка,/ в Те́бе, Святе́м Киво́те,/ я́коже рече́ пра́ведный Дави́д:/ яви́лася еси́ ши́ршая небе́с,/ поноси́вши Зижди́теля Твоего́./ Сла́ва Все́льшемуся в Тя,/ сла́ва проше́дшему из Тебе́,/ сла́ва Свободи́вшему нас Рождество́м Твои́м.

Кондак, глас тойже.
Воскре́сл еси́ я́ко Бог из гро́ба во сла́ве,/ и мир совоскреси́л еси́;/ и естество́ челове́ческое я́ко Бо́га воспева́ет Тя, и сме́рть исчезе́;/ Ада́м же лику́ет, Влады́ко;/ Éва ны́не от уз избавля́ема ра́дуется, зову́щи:/ Ты еси́, И́же всем подая́, Христе́, воскресе́ние.

Вмч. Феодора Стратилата. Тропарь, глас 4.
Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре:/ ору́жиями бо ве́ры ополчи́лся еси́ му́дренно,/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою/ при́сно ублажа́ем.

Кондак, глас 2.
Му́жеством души́ в ве́ру оболки́йся/ и глаго́л Бо́жий, а́ки копие́, в ру́ку взем, врага́ победи́л еси́,/ му́чеников преве́лий Фео́доре,/ с ни́ми Христу́ Бо́гу моля́ся не преста́й о всех нас.

Свт. Феодора, еп. Ростовского и Суздальского. Тропарь, глас 8.
В моли́твах бдя, се́рдцем же о ста́де твое́м вы́ну боле́знуя,/ уче́нием свои́м всех просвети́л еси́, Фео́доре прему́дре,/ те́мже Христа́ Бо́га моли́,/ в день па́мяти твоея́ дарова́ти нам ве́лию ми́лость.

Ин тропарь, глас 8.
В моли́тве бдя, Го́рняя жела́я,/ до́льняя возненави́дел еси́,/ и, се́рдцем боле́знуя, вы́ну о ста́де свое́м пече́шися,/ уче́нием бо свои́м всех просвети́л еси́,/ Фео́доре прему́дре, Христа́ Бо́га моли́ в па́мяти твое́й/ дарова́ти нам ве́лию ми́лость.

Кондак, глас 3.
Я́ко ве́лие со́лнце,/ возсия́ пресла́вная па́мять твоя́, прему́дре Фео́доре,/ в не́йже подава́еши в беда́х су́щим спасе́ние,/ притека́ющим к тебе́ усе́рдно,/ благода́тию, е́юже облагодати́ тя Христ́ос/ в жи́зни несконча́емой.

Обретение мощей блгв. князей Василия и Константина Ярославских. Тропарь, глас 2.
Ва́ше оте́чество хва́лится обагре́нием крове́й ва́ших,/ Це́рковь же Бо́жия ра́дуется,/ прие́мши телеса́ ва́ша,/ лю́дие, пе́сненный лик соста́вльше,/ духо́вною цевни́цею вопию́т:/ лику́й, Васи́лие, ра́дуйся, Константи́не,/ Яросла́влю сла́во и всей Росси́и ра́досте.

Ин тропарь, глас 8.
Возвы́сившеся на доброде́тель, к жела́нию кра́йнему,/ и достиго́сте к Небе́сней высоте́,/ благове́рнии вели́цыи кня́зи Васи́лие и Константи́не,/ и безстра́стным житие́м украси́сте ду́ши своя́,/ поще́нием же изря́дно победи́сте бесо́вския полки́/ и восприя́сте чи́стую со́весть,/ в моли́твах я́ко безпло́тнии пребы́сте,/ возсия́сте в ми́ре, а́ки со́лнце, пресла́внии,/ моли́те спасти́ся душа́м на́шим.

Кондак на преставление, глас 8.
Я́ко цве́ти честни́и разли́чный,/ в ра́йстей пи́щи процве́тше невеще́ственно,/ оте́честву своему́ сла́ву ве́лию/ и сро́дником похвалу́ и честь я́вльше,/ всеи́стиннии побе́дницы, вели́кий Васи́лие и сла́вный Константи́не,/ но у́бо не преста́йте моля́щеся о гра́де ва́шем и о всех рабе́х свои́х,/ изба́вити их от напа́стей, и бед, и вся́ких лю́тых обхожде́ний, вопию́щих вам:/ ра́дуйтеся, гра́ду на́шему Яросла́влю вели́кое утвержде́ние.

Кондак на обретение мощей, глас 4.
Днесь Це́рковь разширя́ет не́дра своя́/ и прие́млет многоцеле́бныя мо́щи ва́ши,/ добропобе́днии страда́льцы,/ Васи́лие сла́вне и Константи́не Богому́дре,/ и, я́ко шипо́к благово́нный, напоя́ется пречу́дными арома́ты,/ бога́тными чудодея́нии от неистощи́мых сокро́вищ,/ от пресла́вных моще́й ва́ших,/ и ра́достно чад свои́х созыва́ет вопи́ти, лю́дие:/ ра́дуйся, дво́ице пречу́дная, оте́честву своему́ стено́ необори́мая.

Урюпинской иконы Богородицы. Тропарь, глас 3.
Яви́лася еси́ на дре́ве в Донско́й земли́,/ благода́тная Твоя́ ико́на. Богоро́дице,/ больны́я исцеля́ти, заблу́ждшия обраща́ти;/ те́мже уми́льно мо́лимся Тебе́:/ изба́ви град наш от вся́каго зла/ и спаси́ лю́ди, к Тебе́ притека́ющия.

Кондак, глас 5.
Всеблага́я Чи́стая Богоро́дице,/ к Тебе́ прибега́ем, ве́рнии,/ Тобо́ю бо позна́хом ми́лость Бо́жию,/ чу́дную ико́ну Твою́,/ от нея́ же вси здра́вие и спасе́ние прие́млем.