Воскресенье 25 февраля 2018 / 12 февраля 2018

Неделя 1-я Великого поста, Торжество Православия. Глас пятый.
Великий пост. Пища с растительным маслом

Иконы Божией Матери Кипрской в с. Стромынь Московской обл. (переходящее празднование в Неделю 1-ю Великого поста ).
Иверской иконы Божией Матери (IX).
Свт. Мелетия, архиеп Антиохийского (381).
Свт. Алексия, митр. Московского и всея России, чудотворца (1378).
Свт. Мелетия, архиеп. Харьковского (1840).
Новосщмч. Алексия, еп. Воронежского (1930).
Новомч. прот. Митрофана (1931).
Прп. Марии, именовавшейся Марином, и отца ее Евгения (VI).
Свт. Антония, патриарха Константинопольского (895).
Прп. Мелетия Ипсенийского (XIX).
Прп. Вассиана Угличского.
Св. Каллии.
Прп. Гертруды Нидерландской.
Св. Эфивальда Ландисфарнского (740) (Кельт. и Брит.).
Новомч. Хрестоса Константинопольского (1748) (Греч.).
Мчч. Сатурния и Плотиния (Греч.).
Сщмч. Урвана, еп. Римского (223-230).
Свв. Прохора Грузина (X), Луки Иерусалимского (1277), Николая Двали (1314) и других мучеников и преподобных, живших в Грузинских монастырях Иерусалима.

Чтения дня

Луки 24:12-35 (на утрене. Евангелие 5-e)
Евреям 11:24-26, 32-12:2
Иоанна 1:43-51
Филиппийцам 2:5-11 (Богородице)
Луки 10:38-42; 11:27-28 (Богородице)
Евреям 13:17-21 (святителю)
Луки 6:17-23 (святителю)

Тропари

Торжество Православия. Иный тропарь, глас 2.
Пречи́стому о́бразу Твоему́ покланя́емся, Благи́й,/ прося́ще проще́ния прегреше́ний на́ших, Христе́ Бо́же,/ во́лею бо благоволи́л еси́ пло́тию взы́ти на Крест,/ да изба́виши, я́же созда́л еси́, от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.

Кондак, глас 2.
Неопи́санное Сло́во Óтчее,/ из Тебе́, Богоро́дице, описа́ся воплоща́ем,/ и оскве́рншийся о́браз в дре́внее вообрази́в,/ Боже́ственною добро́тою смеси́,/ но испове́дающе спасе́ние,/ де́лом и сло́вом, сие́ вообража́ем.

Тропарь воскресный, глас 5.
Собезнача́льное Сло́во Отцу́ и Ду́хови,/ от Де́вы ро́ждшееся на спасе́ние на́ше,/ воспои́м, ве́рнии, и поклони́мся,/ я́ко благоволи́ пло́тию взы́ти на Кре́ст,/ и сме́рть претерпе́ти,/ и воскреси́ти уме́ршия/ сла́вным воскресе́нием Свои́м.

Богородичен, глас тойже.
Ра́дуйся, две́ре Госпо́дня непроходи́мая./ Ра́дуйся, стено́ и покро́ве притека́ющих к Тебе́./ Ра́дуйся, необурева́емое приста́нище и неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й от воспева́ющих,/ и кла́няющихся рождеству́ Твоему́.

Кондак, глас тойже.
Ко а́ду, Спа́се мой, соше́л еси́,/ и врата́ сокруши́вый я́ко всеси́лен,/ уме́рших я́ко Созда́тель совоскреси́л еси́,/ и сме́рти жа́ло сокруши́л еси́,/ и Ада́м от кля́твы изба́влен бы́сть,/ Человеколю́бче, те́мже вси зове́м:/ спаси́ нас, Го́споди.

Иверской иконы Богородицы. Тропарь, глас 4.
От святы́я ико́ны Твоея́,/ о Влады́чице Богоро́дице,/ исцеле́ния и цельбы́ подаю́тся оби́льно/ с ве́рою и любо́вию приходя́щим к ней./ Та́ко и мою́ не́мощь посети́,/ и ду́шу мою́ поми́луй, Блага́я,/ и те́ло исцели́ благода́тию Твое́ю, Пречи́стая.

Кондак, глас 8.
Áще и в мо́ре вве́ржена бысть свята́я ико́на Твоя́, Богоро́дице,/ от вдови́цы, не могу́щия спасти́ сию от враго́в,/ но яви́лася есть Храни́тельница Афо́на/ и Врата́рница оби́тели Иве́рския, враги́ устраша́ющая/ и в Правосла́вней Росси́йстей стране́/ чту́щия Тя от всех бед и напа́стей избавля́ющая.

Ина служба Иверской иконы Богородицы.
Тропарь, глас 1.

Де́рзость ненави́дящих о́браз Госпо́день/ и держа́ва нечести́вых безбо́жно в Нике́ю прии́де,/ и по́сланнии безчелове́чно вдови́цу,/ благоче́стно чту́щую ико́ну Богома́тери, истязу́ют,/ но та́я но́щию с сы́ном ико́ну в мо́ре пусти́, вопию́щи:/ сла́ва Тебе́, Чи́стая,/ я́ко непроходи́мое мо́ре плещи́ своя́ подаде́,/ сла́ва правоше́ствию Твоему́, Еди́на Нетле́нная.

Кондак, глас 4.
Совозсия́ днесь Све́ту Воскресе́ния свет чи́стыя ико́ны Твоея́,/ обоя́ ве́село торжеству́юще вопие́м:/ сохрани́ раб Твои́х благодати́ю, Влады́чице.

Свт. Алексия, митр. Московского и всея России. Тропарь, глас 8.
Я́ко апо́столом сопресто́льна,/ и врача́ предо́бра, и служи́теля благоприя́тна,/ к ра́це твое́й честне́й притека́юще, святи́телю Алекси́е, Богому́дре чудотво́рче,/ соше́дшеся, любо́вию в па́мять твою́ све́тло пра́зднуем,/ в пе́снех и пе́ниих ра́дующеся и Христа́ сла́вяще,/ такову́ю благода́ть тебе́ дарова́вшаго исцеле́ний/ и гра́ду твоему́ вели́кое утвержде́ние.

Ин тропарь, глас 4.
Апо́стольских догма́т опа́сна храни́теля,/ Це́ркве росси́йския па́стыря и учи́теля,/ преблаже́ннаго Алекси́я святи́теля па́мять пра́зднующе,/ славосло́вим Христа́ Бо́га на́шего пе́сньми достодо́лжными,/ дарова́вшаго нам уго́дника Своего́,/ я́ко оби́льный исто́чник, точа́щ врачева́ния,/ гра́ду же Москве́ похвалу́ и утвержде́ние.

Ин тропарь, глас 8.
Я́ко светоно́сная возсия́ днесь па́мять твоя́, сла́вне,/ ве́рных озаря́ющи ду́ши и телеса́,/ и исцеле́ния струи́ Богоприя́тными ти моли́твами источа́еши,/ о́тче святи́телю Алекси́е,/ те́мже тя мо́лим, я́ко архиере́ом сопресто́льна и чудоде́йственника изря́дна,/ и́же Христо́ву Престо́лу предстоя́й,/ о нас не оскудева́й моля́ся спасти́ся душа́м на́шим.

Кондак, глас 8.
Боже́ственнаго и пречестна́го святи́теля Христо́ва,/ но́ваго чудотво́рца Алекси́я,/ ве́рно вси пою́ще, лю́дие, любо́вию да ублажи́м, я́ко па́стыря вели́каго,/ служи́теля же и учи́теля прему́дра земли́ Росси́йстей./ Днесь, в па́мять его́ прите́кше,/ ра́достно возопие́м песнь Богоно́сному:/ я́ко име́я дерзнове́ние к Бо́гу,/ многообра́зных нас изба́ви обстоя́ний, да зове́м ти:/ ра́дуйся, утвержде́ние гра́ду на́шему.

Свт. Мелетия, архиеп Антиохийского. Тропарь, глас 4.
Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́,/ я́же веще́й и́стина,/ сего́ ра́ди стяжа́л еси́ смире́нием высо́кая,/ нището́ю бога́тая./ Óтче Меле́тие,/ моли́ Христа́ Бо́га/ спасти́ся душа́м на́шим.

Кондак, глас 6.
Духо́внаго твоего́ дерзнове́ния убоя́вся,/ отсту́пник бе́гает Македо́ний,/ моли́твенное же служе́ние соверша́юще, твои́ раби́,/ любо́вию притека́ем,/ Áнгелом собесе́дниче, Меле́тие,/ о́гненный мечу́ Христа́ Бо́га на́шего,/ вся безбо́жныя закала́яй:/ воспева́ем тя, свети́льника, просвети́вшаго вся.

Свт. Мелетия, архиеп. Харьковского. Тропарь, глас 4.
Ми́ра сего́ вре́менная, я́ко преходя́щая уразуме́л еси́,/ от ю́ности по́стническое и многотру́дное житие́ возлюби́л еси́, всеблаже́нне,/ иера́рхов сла́во и преподо́бных похвало́,/ Предве́чнаго Сло́ва усе́рдный благове́стниче,/ си́рых и неиму́щих кро́ве и прибе́жище./ Тем же в моли́твах пребыва́я, Христу́ у́треневати прилежа́л еси́/ и, Сего́ взыску́я, вене́ц неувяда́емый со все́ми святы́ми стяжа́л еси́,/ о́тче наш, святи́телю Меле́тие,/ моли́ Христа́ Бо́га спасти́ся душа́м на́шим.

Кондак, глас 4.
Ревну́я, поревнова́л еси́ к Бо́гу, Его́же возлюби́л еси́/ и Его́же всем се́рдцем возжела́л еси́, о́тче наш Меле́тие,/ и Его́же ра́ди к и́ноческому по́двигу поте́кл еси́/ и закла́тися Христу́ Бо́гу сама́го себе́ приве́л еси́,/ я́ко па́стырь до́брый вруче́нное тебе́ ста́до ове́ц Христо́вых му́дре упа́сл еси́./ Моли́ о нас Христа́ Бо́га, святи́телю достохва́льне.